Coming soon

男生看靚女

2017-12-15

林日曦:「香港這個城市太浮躁,資訊太多太雜,但話題卻單一、八卦。對靚女的形象也如是,例如高登女神不單要樣靚,還追求長腿「黑絲」誘惑,靚女配甲組腳就口誅筆伐,標準太單一也太苛刻,香港就算有幾多靚女也被打沉。」

徐羨曾(阿徐):「好多人覺得香港女仔好識打扮,但有時過分打扮會變得迷失。」

m:metropop 林:林日曦 徐:徐羨曾

還看個性

m:你們心目中的「靚女」是怎樣的呢?
林:我心目中的靚不是純看外表的,我覺得聰明的女仔就會靚,蠢女人唔夠智慧做判斷,容易受世俗影響而跟風,有智慧自然有自信,就會靚。
徐:我好怕那些化濃妝、噴怪味香水的女仔,不明白她們點解要咁誇咁俗,女生的美源自個性,懂得欣賞自己,別人自然也會懂得欣賞你。時代不同了,八十年代的女士真係好誇好搶,洗衫板放上膊頭、眼影畫到去耳仔那套已經唔啱這個時代。現在的女仔可以將自己變得「普通」一點,即係搵舒服、啱自己的打扮。可以表現到你的真我才重要。

柏安妮

m:你們看靚女真的完全不理外觀嗎?舉個例,大家都位知余慕蓮做過很多善事很有善心,但電視上「醜婦」她的形象真的太深入民心。坦白說,你認為余慕蓮靚嗎?
林:靚唔靚,其實是相對的,表面上余慕蓮不是靚女,但難保我有機會接觸她真人,與她溝通過後會有觸電的感覺。現在大家玩facebook玩Instagram,那些女仔相好似好高質,但其實個個都執過晒才放上網,見到真人就失望,大家慣了網絡世界的假面目,只靠個樣判斷靚唔靚女,好易出事。

m:年紀不同,欣賞女性的角度有無改變?
徐:年紀不同睇女仔的標準也會變,後生時暗戀對象當然是長髮、斯文,好似周慧敏般的玉女型女生,平時眼甘甘望的當然是睇心口及身材,血氣方剛係鍾意sexy lady。對靚女係有好多典型標準,眼大大是必要,最好矮自己小小的,好似柏安妮那種樣貌清純標致,又可以性感的就最正。人大了,對靚女的標準不再那麼狹窄,慢慢被一些有個性的女生吸引,好似林憶蓮,單眼皮眼細細,其實都好吸引。

林憶蓮

何須標準

林:其實我一直對靚女都無特別標準,細個就更加是懵懵懂懂的,我記得我和我初戀情人拍拖,因為她的外表不出眾,當年一起時我是被全班friends取笑的。其實我一直都喜歡有智慧的女生,我承認我有戀姐情意結的,有點閱歷的女生先夠charm。

m:哈,媒體經常恐嚇女生,標籤25歲就是中女,30歲都未結婚仿佛要孤獨終老要等死,難得有男士覺得女人愈老愈可愛。
林:除非是非洲那些落後部落,那些女仔15歲就結婚生子,為了傳宗接代,當然愈青春愈好。不過我們生於長壽城市,大家都無咁快老。在我心目中一直認為三字頭的女人最正,叫每個女人攞返自己的相出來,相信你會發現,三十幾歲的你其實比十幾歲時靚好多,因為現在的你識打扮也有能力找到適合自己的化妝與衣著。

m:今時今日,有誰可以讓你們有驚艷的感覺?
徐:娛樂事業蓬勃,好似好多靚女湧現,原本是好事。可是有些女仔可以純靠美色可以搵食,本來是靚女,可是卻不看書,令到現時的女仔難免變得膚淺。近年我認為內外俱備好吸引到我的是謝安琪。
林:想了很久,終於想到一個,那是陳綺貞。某次看林奕華的《十八相送》,那次坐了第一行,有一幕是陳綺貞坐正我對面彈著結他表演,那一剎因為她的音樂才華與靚聲而心跳加速,而且我也欣賞她一直唱自己的歌、走自己的路。

#391
TEXT. KIMMY
PHOTO. FRANKY、WAI 、Deon Wong & 網上圖片



    相關文章